14 хүртэлх насны хүүхдүүд нийгмийн сүлжээнд хуудас нээхийг хориглох, мөн 14-15 насны хүүхдүүд аккаунт нээхдээ эцэг эхээсээ зөвшөөрөл авдаг байх тухай хуулинд АНУ-ын Флорида муж улсын захирагч Рон Десантис гарын үсэг зуржээ.

“Таны хүүхэд гэртээ байх үед нийгмийн сүлжээнүүд түүнд аюул учруулдаггүй мэт санагдаж магадгүй, гэтэл таны гэр оронд шууд нэвтэрдэг араатнууд бий. Тэд янз бүрийн платформуудыг өөр зорилгоор гуйвуулан ашигладаг нь маш том асуудлыг үүсгэж байна” гэж Десантис хэллээ.

Хэрвээ хэн нэгэн шүүхэд зарга мэдүүлэхгүй бол уг хууль 2025 оны нэгдүгээр сарын 1-нээс хүчин төгөлдөр болох юм.  

Гэхдээ хуулинд хэд хэдэн эргэлзээтэй асуудал байгаагийн нэг нь яг тодорхой нийгмийн сүлжээнүүдийг нэрлэж заагаагүй явдал юм.

Виржиниагийн их сургуулийн профессор Дэвид Эванс ярихдаа “14 хүртэлх насныхан нийгмийн сүлжээг ашиглахыг хориглох тухай хуулийн талаар юу бодож байна гэж 11 настай охиноосоо би асуухад YouTube ч гэсэн нийгмийн сүлжээ мөн үү гэж урдаас сөргүүлэн асуулаа.  Ютүбийг дунд сургуульд байнга ашигладаг, энэ сүлжээнээс хүүхдүүд маш их зүйлийг сурч мэдэж авдаг. Гэхдээ уг сүлжээ бусад нийгмийн сүлжээтэй адил аюултай зүйлсийг агуулж байдаг нь нууц биш. Хуулийг уншаад үзэхэд, нийгмийн сүлжээ гэж яг юу вэ, уг хууль чухам ямар сүлжээнүүдийг хамрах вэ гэдэг нь тодорхойгүй байна” гэлээ.

Өөр нэгэн бэрхшээл нь нийгмийн сүлжээнүүд дэлхийг хэрсэн энэ үед Флоридагийн эрх баригчид муж улсынхаа өсвөр настнуудыг хэрхэн хянах вэ гэдэгт оршино.
Үүний сацуу, шинэ хуулийн бас нэгэн дутагдалтай тал гэвэл, хүмүүсийн хувийн мэдээллийн нууцлал алдагдах аюул юм. Тодруулбал, бүх шинэ хэрэглэгчийн насыг тодорхойлохын тулд тэднээс хувийн мэдээллээ өгөхийг шаардана.

«Пью» судалгааны төвийн санал асуулгаар, насанд хүрсэн америкчуудын 81 хувь нь хүүхдүүд нийгмийн сүлжээг ашиглахдаа эцэг эхээсээ зөвшөөрөл авахыг дэмжсэн бол нийгмийн сүлжээг ашиглахын өмнө хүүхдүүд өөрсдийн насыг мэдүүлдэг байх ёстой гэж 71 хувь нь үзжээ.

Өмнө нь Арканзас, Охайо, Юта гэсэн гурван муж улсад дээрхтэй яг ижил хуулийг баталсан боловч нийгмийн сүлжээний компаниуд шүүхэд зарга мэдүүлснээр хууль хүчингүй болж байв.