“Бэлчээрийн мал аж ахуй, нүүдлийн өв соёлын нийгэмлэг” ТББ-аас Бэлчээрийн тухай хуулийг эсэргүүцэж мэдэгдэл гаргаж буй талаараа өнөөдөр мэдээлэл өглөө. 

Тус төрийн бус байгууллагыг малчдын төлөөлөл байгуулсан бөгөөд УИХ-д дараах шаардлагыг хүргүүлж байгаа юм байна. 

Шаардлагад "Өнгөрсөн өвлийн гамшиг нь 100 жилд тохиолдоогүй үзэгдэл болж өнгөрлөө. Энэ нь НҮБ-ын гамшгийн бүртгэлд орсон зуд хэмээх нэршлийн үзүүлэлтийн хэмжээ Монгол Улсын Гамшгийн тухай хуульд заасан үзүүлэлтийг давсан. Цунами, газар хөдлөлт зэрэг байгалийн гамшигтай харьцуулж болно. Мал үхэх нэг хэрэг. Тухайн малыг маллаж байсан хүмүүсийн сэтгэлзүй маш чухал юм.

Банкны зээлтэй үлдсэн 150 орчим мянган малчин өрхийн эдийн засгийн дарамтад хүний амь эрстэх, сэтгэлзүйн нөлөөлөлд гүн автах аюул тулгараад байна. Энэ нь ажлын байраа алдах эрсдэлээс хэт хол давсан асуудал юм. 

Иймд гамшгийн дараах сэргээн босгох ажиллагааны нэн тэргүүний ажил нь 1.2 их наяд төгрөг төлж, малчдын зээлийг тэглэх тухай юм. 

Малчид, тэдний оршихуйн үндэс болсон газар, бэлчээрийг төр хуулиар зохицуулахгүй. Өнгөрсөн хугацаанд УИХ, Засгийн Газрын боловсруулсан хууль журмаар бэлчээрийг зохицуулах нь алсдаа бэлчээрийн мал аж ахуйг устгах хэтийн санааг агуулсан байна. 

Сүүлийн 30 жил Засгийн Газрын мэргэжилтэн дарга нарын эрлийзжүүлэг, суурин мал аж ахуйг сайн гэх бэлчээрийн мал аж ахуйг ашиггүй гэсэн тархи угаалт нь Монгол Улсын малын генетик нөөцийг алдагдуулж байна. Хэрэглэгчийн хүнсний хангамж, аюулгүй байдалд сөргөөр нөлөөлж, хүний эрүүл мэндэд ноцтой хор хохирол тулгарч хяналтгүй, химийн гаралтай эм бэлдмэл хэтрүүлэн хэрэглэхэд хүргэсэн байна" гэжээ.