Хөгжлийн банкны хэрэгтэй холбоотой 80 хүн, дөрвөн хуулийн этгээдэд холбогдох хэргийг прокуророос шүүхэд шилжүүлээд байгаа. Улмаар Нийслэлийн прокуророос яллагдагч нарыг шүүхэд ирүүлж, хэргийг бүртгэх ажиллагаа явагдаж байгаа юм. Хөгжлийн банкны хэрэгт УИХ-ын гишүүн Н. Алтанхуяг, Ё. Баатарбилэг, Г. Амартүвшин, Х. Ганхуяг нар нэр холбогдож, улмаар АТГ-ын мөрдөн шалгах хэлтсээс хэргийг шалгаж, шүүхэд шилжүүлэх саналтайгаар прокурорт шилжүүлээд байсан юм. Тэгвэл Нийслэлийн прокуророос Ё. Баатарбилэг, Н. Алтанхуяг нарт холбогдох хэрэгт Эрүүгийн хуулийн 22.1.2 дугаар зүйлд зааснаар яллах дүгнэлт үйлдэж, шүүхэд шилжүүлжээ. Харин УИХ-ын гишүүн Г. Амартүвшин, Х. Ганхуяг нарт холбогдох хэргийг хараахан шилжүүлээгүй гэсэн албан бус мэдээ байна. АТГ-аас 86 хэргийг шүүхэд шилжүүлэх саналтайгаар прокурорт шилжүүлсэн бол прокурор үүнээс 80 хэргийг шүүхэд шилжүүлсэн байна. Үүнээс үлдсэн 6 хэргийн 4-ийг тусгаарлаад байгаа бол үлдсэн 2 хэрэг нь хэрхсэн нь одоогоор тодорхойгүй байгаа юм.