Дархан аймгийн Дархан сумын .... багийн ... тоотод иргэн ... овогтой ... нь гэртээ том охинтойгоо маргалдаж улмаар савтай бензин гэрийн үүд хэсэг рүүгээ шидсэний улмаас бага хүүгийн биед бензин цацагдан гал авалцаж биеийн 45-50 хувь нь түлэгдэж, эмнэлэгт эмчлэгдэж байгаад амь нас нь хохирсон хэрэгт холбогджээ.

Яллагдагч нь “...Тухайн өдөр би гэрээ янзалж өвлийн бэлтгэлээ хийх гээд ажил ихтэй байсан. Том охиныг тусал гэхэд сургууль руугаа явна гэсэн. Би чи ямар хүүхдүүдтэй найзлаад яваад байгаа юм бэ гээд бид хоёр муудалцсан. Уурандаа орны хажуу талд байх хуванцар савтай зүйлийг охины зогсож байсан хэсэг болох хөргөгч рүү шидсэн. Гэтэл гэнэт гал гарч манай бага хүүхдийн толгой, нүүр, гар хэсэг түлэгдсэн. Түргэн дуудаад эмнэлэг явсан. Үүний дараа цагдаа ирсэн. Би зун болохоор өвс хаддаг ба бензинийг өвсний хадууртаа хийж ажиллуулдаг. Тухайн бензинийг бензин колонкоос авсан. Анх үүдний амбаарт 250 орчим миллиграммтай байсан. Үүдний амбаар хэсгийг янзалж байхдаа гэртээ оруулж тавьсан...” гэжээ.

Шүүх эмнэлгийн дүгнэлтээр “... Талийгаачийн цогцост нүүр, толгойн оройн хэсгийн хуйх, зүүн бугалга, шуу, сарвуу, цээжний зүүн хэсэг, баруун бугуйн үе, сарвуу хэсгээр тармал түлэгдсэн шарх, биеийн нийт гадаргын 45-50 хувийг хамарсан III А, Б зэргийн түлэгдэлт гэмтэл тогтоогдлоо. Дээрх гэмтэл нь өндөр хэмийн үйлчлэлээр үүсгэгдэнэ. Талийгаач нь биеийн нийт гадаргын 45-50 хувийг хамарсан III А, Б зэргийн түлэгдэлтээр нас баржээ...” гэжээ.

Шүүх шүүгдэгчид хоёр жилийн тэнсэн харгалзах ял оноожээ.