Нэгдүгээр сарын 14-ний өдөр Украйны Днипро хотын орон сууц Оросын пуужингийн цохилтод өртөх үеэр 46 хүн амь үрэгдэж, 80 гаруй хүн шархадсан харамсалтай явдал гарсан. Амь үрэгдэгсдийн дотор 6 хүүхэд байсан юм. Энэ нь Украйны дайн эхэлсэн цагаас хойш хамгийн олон энгийн номхон иргэд нэгдор амиа алдсан тохиолдол байлаа. Хэдийгээр хуулиар хориотой ч Оросын зарим хотуудад иргэд Украйны амь үрэгдсэн иргэдийн дурсгалыг хүндэтгэж байна. Иргэд Украйны урлаг соёлын алдартай хүмүүсийн хөшөө дурсгалуудын дэргэд цэцэг, тоглоом, ном, лаа зэргийг тавьж, хүндэтгэл үзүүлж байна. Энэ даваа гаригт Москва хот дахь яруу найрагч Леся Украйнкагийн хөшөөний дэргэд дурсгалын зүйлс ихээр цугларчээ. Хотын цагдаагийн газар хүндэтгэл үзүүлсэн хүмүүсээс заримыг баривчилж, цугларсан эд зүйлсийг хурааж байсан ч иргэдийн цуваа тасрахгүй байгаа юм. Ингэснээр сүүлдээ хууль сахиулагчид уг хөшөөний дэргэд хөдөлгөөнт эргүүлийн автомашиныг байрлуулжээ. Москвагаас гадна Санкт-Петербург, Краснодар, Екатеринбург зэрэг хотуудад Украйнтай холбоотой хөшөөнүүдийн дэргэд Оросын иргэд Днипрогийн хохирогсдын дурсгалд хүндэтгэл үзүүлжээ.