Д.Мөнх-Эрдэнийг дахиад л хорьчихлоо. Өөр цагдан хорьчих, амыг нь барьчих хүн олдоогүй юм байх даа. Ийм яриа гудамжинд, сошиалаар ч хөвөрч харагдах. Яг үнэндээ хууль, шүүхийн өмнө хүн бүр тэгш эрхтэй. Тиймээс Д.Мөнх-Эрдэнэ байтугай хэн бүхэн хуулиас дээгүүр “жаалбал” хариуцлага хүлээж л таарна.  

Үндсэн хуулиар олгосон хүний нэр төр, алдар хүндийг гутааж үл болно гэх заалт энд үйлчилнэ. Д.Мөнх-Эрдэнийн хувьд таалагдаагүй хэнбугай ч байсан салаавч гаргана, заамдана, хэл амаар доромжилно, төрийн байгууллага руу дайрч орон “Хэнээ гараад ир” гэж хашгична. Ах зах, албан тушаалтан байна уу, өөрт нь таалагдаагүй бол үсчиж өгнө.  Гэвч төр төмбөгөр, ёс ёмбогор гэдэг.  

Түүний энэхүү үйлдэл хэрээс хэтэрч, өөрийгөө шударга үнэний дуу хоолой болж байна хэмээн тэрбээр эндүүрдэг. Тийм биш юм. Харин ч эсрэгээрээ төрийг, хуулийг үл ойшоох түүний “орилоон” залууст муу үлгэр дууриалал үзүүлнэ.  

Эрдэмт хүн дөлгөөн гэдэг. Үнэхээр төр, засагт хэлмээр, зүхмээр зүйл байвал илэрхийлэх өөр олон арга бий.  

Харин Д.Мөнх-Эрдэнийг хоёрдахиа “Урьд нь авсан таслан сэргийлэх арга хэмжээг зөрчсөн” хэмээн прокуророос үзэж, цагдан хорих саналыг шүүхэд хүргүүлснээр дахин саатуулжээ. Төр цаазтай, хууль шүүхтэй улсын хувьд Д.Мөнх-Эрдэнэ нарын дураараа дургигсдыг  хуулиар хязгаарлахгүй бол олон арван Д.Мөнх-Эрдэнэ төрж, тааралдсан бүхнээ зүхэж,  дуртай газраа орилж хашгиран салаавч гарган чичилдэг болно. Энэ  магадгүй та ч, би ч байж мэдэх юм.