Өнөөдөр (2023.01.24) АНУ-ын Калифорнид зэвсэгт этгээд хүмүүс рүү гал нээж, долоон хүн амиа алдсан харамсалтай хэрэг гарчээ. Дээрх этгээд нь халдлагаа Сан Франциско хотоос өмнө зүгт 50 км ийн зайд орших Халф Мун Бэй хотын эрэг дээрх хоёр өөр газарт үйлджээ. Хэргийн эхний дөрвөн хохирогчийг орон нутгийн цагаар 14:20 цагийн орчим “Мөөгний ферм”-ээс олсон бол нөгөө гурван хохирогчийг дараахан нь ойролцоох аж ахуйгаас олжээ. Халдлага үйлдсэн этгээд нь Ази гаралтай нутгийн оршин суугч  67 настай Жао Чунли гэгч байсан бөгөөд түүнийг орон нутгийн цагдаагийн газар руу машинаа өөрөө жолоодон явж байхад нь баривчилсан байна. Үүнээс ердөө хоёрхон хоногийн өмнө буюу өнгөрсөн ням гаригийн орой АНУ-ын Лос Анжелес хотын ойролцоох “Монтерей Парк” хотод сарны хуанлийн цагаан сарын баяр тэмдэглэж байсан Азиуд руу зэвсэгт этгээд гал нээсэн хэрэг гарсан. Энэ халдлагын үеэр 10 хүн нас барж, олон хүн шархадсан юм.