Нийслэлийн иргэдийн цаг завыг хамгийн их барж, ажил амьдрал “уясан” мөнхийн сэдэв бол түгжрэлийн асуудал болоод удаж байна. Хүн бүр өөр зуураа замын хөдөлгөөний түгжрэлээс хэрхэн ангижрах талаар ярьж, шүүмжилж, хэлэлцэж, санаа оноогоо хуваалцаж байгаа юм. Тэгвэл өнөөдөр иргэн Д.Дорждагва хэвлэлийн хурал хийлгэж, түгжрэлээс хэрхэн ангижирч болох өөрийн байр суурийг илэрхийлсэн юм. Тэрээр хэлэхдээ: 
“Амгалангаас Дүнжингаравт ирдэг уулзвар дээр бараг нэг цаг гацаж байна. Миний төлөвлөгөөгөөр бол Дүнжингаравын том хашааг дотогш нь болгоод хоёр эгнээ нэмбэл тэр уулзвар түгжрэлгүй болно. Эдийн засгийн хувьд түгжрэлийн хохирол хэмээн гурван их наяд төгрөгийг алдаж байна. Гурав, дөрвөн цаг гэр орондоо очиж чадахгүй, сэтгэл санаагаар хохироод галзуурах шахдаг. Үүнээс гарах ганц арга бол уулзваруудыг шинэчлэх юм” гэлээ. Мөн тэрээр цааш нь “Түгжрэл бага багаар бий болдог, жаахан дэм өгөхөд л байхгүй болно. Төв шуудангаас уулзвараас болоод бусад уулзвар түгжрээд нам болдог. Замын уулзварууд дээр барилга шахаж барих нь буруу. Уулзваруудыг томруулбал түгжрэл буурна” хэмээн сэтгэгдлээ хуваалцжээ.