Оршин суудаг хаяг, нэр нь тодорхойгүй 35-40 орчим настай эрэгтэй хүний цогцос найман хоногийн өмнө буюу 10 дугаар сарын 06-ны өдөр Баянгол дүүрэгт байрлах худгаас олдсон тухай бид өмнө нь мэдээлсэн.
Энэ талаар ОБЕГ "Нийслэлийн Баянгол дүүргийн 20 дугаар хороонд дулааны худаг дотроос цогцос гаргуулах шаардлагатай байна гэсэн дуудлагыг тус дүүргийн цагдаагийн II хэлтсээс 10 дугаар сарын 06-ны өдрийн 12.12 цагт хүлээн авсан. Нийслэлийн Аврах ангийн алба хаагчдыг очиход, оршин суугаа хаяг нэр тодорхойгүй иргэн /35-40 орчим настай, эрэгтэй/ нь 1.3 метр гүн дулааны худаг дотор нас барсан байдалтай байсныг 22 минут ажиллан гаргаж, БГД-ийн Цагдаагийн II хэлтсийн мөрдөгчид шилжүүлэн өгсөн" хэмээсэн.
Харин ЦЕГ-аас тодруулахад "Нийслэлийн Баянгол дүүргийн 20 дугаар хороонд дулааны худаг дотроос олдсон цогцсын талаар шалгалт хийсэн. Ингэхэд ямар нэгэн гэмт хэргийн холбогдолгүй, урьдчилсан байдлаар архины хордлогын улмаас амиа алдсан эрэгтэй хүний цогцос болох нь тогтоогдсон. Мөн тухайн худагт удаан хугацаанд байгаагүй болох нь шинжилгээний дүгнэлтэд харагдаж байна. Бид тухайн цогцсыг ар гэрт нь хүлээлгэн өгсөн" хэмээсэн юм.