Дорнод аймгийн Баяндун сумын Түргэн багийн Дунгийн-Улаан замын булаг гэдэг газар /аймгийн төвөөс хойд зүгт 240 км, сумын төвөөс зүүн хойд зүгт 45 км/ хээрийн гал түймэр гарсан тухай дуудлагыг аравдугаар сарын 11-ний 15:01 цагт холбогдох байгууллагууд хүлээн авсан байна.
Тус аймгийн Онцгой байдлын газрын Эрэн хайх, аврах анги, Баян-Уул сум дахь Гал түймэр унтраах, аврах 53 дугаар ангийн алба хаагчид, Баяндун, Дашбалбар, Сэргэлэн,  Гурванзагал, Баян-Уул сумын мэргэжлийн ангийнхан, орон нутгийн иргэд хээрийн гал түймрийг унтраах ажиллагааг зохион байгуулан ажиллаж, аравдугаар сарын 14-ний өдрийн 09:30 цагт цурамд оруулан 18:40 цагт бүрэн унтраажээ.
Уг хээрийн түймэрт тус сумын харьяат малчин 54 настай Б өртөж түлэгдсэнийг аймгийн Бүсийн оношилгоо, эмчилгээний төвд шилжүүлсэн байна. Урьдчилсан байдлаар хээрийн гал түймэрт 75,000 га талбай, дөрвөн ханатай 2 гэр, гурван айлын малын хашаа, нэг автомашин, 6х4 метрийн хэмжээтэй байшин өртөж шатжээ.