Израилын зэвсэгт хүчин Газын зурваст явуулсан довтолгооны үеэр Хамас бүлгийн удирдагч Яхья Синвар амь үрэгдсэн байна. Синвар бол өнгөрсөн жилийн аравдугаар сард Израил руу Хамас бүлэг довтолсон дайралтыг төлөвлөж, санаачилсан хүн юм. Тэрээр ийнхүү амь үрэгдсэн нь Израилын хувьд томоохон амжилт. Барууны удирдагчид Синвар нас барсан нь Газын зурвасын дайныг дуусах томоохон боломж хэмээсэн юм. Израилын Ерөнхий сайд Бенжамин Нетаньяху мэдэгдэл хийхдээ хариугаа авлаа, Синварын үхэл бол дайны төгсгөлийн эхлэл гэсэн байна.

АНУ-ын Ерөнхийлөгч Жо Байден Синвар амиа алдсан нь “Дэлхийн хувьд сайн явдал тохиосон өдөр” хэмээж, Хамасын барьцаалсан хүмүүсийг суллаж дайныг зогсоох боломж хэмээсэн юм. Израилын зэвсэгт хүчин мэдэгдэл хийхдээ Синварыг лхагва гарагт /2024.10.16/ явуулсан ажиллагааны үеэр хөнөөсөн гэжээ. Тус мэдэгдэлдээ “Цогцос таних үйл явц дууссаны дараа Яхья Синварыг хөнөөсөн гэдгийг баталж байна” хэмээсэн юм. АНУ-ын Төрийн департаментын хэвлэлийн төлөөлөгч Мэттью Миллер мэдэгдэл хийхдээ Синвар дайныг дуусгахад тулгарасан гол саад байсан тул одоо АНУ гал зогсоох хэлэлцээг эхлүүлэх хүсэлтэй байгаа гэжээ. Одоогийн байдлаар Хамас бүлэг ямар нэгэн мэдэгдэл хийгээгүй байгаа юм