Эх орны дархан хил амар амгалан байх, үндэсний аюулгүй байдал тогтуун оршихын суурь нь цэргийн хүч байдаг. Эр цэргийн тоо олон, чадвар нь сайн байвал тусгаар тогтнолын суурь нь бат бэх байна.

Тэгвэл өнөөдөр Улаанбаатар хотод 2024 оны II ээлжийн цэрэг татлага болж байна.

Цэрэгт явж эх орны хүү болох гэтэл цалингийн аль эсвэл банк бус санхүүгийн байгууллагын зээлтэй байх нь их. Үнэндээ иргэдийн хувийн асуудлыг үл авч үзэн залуусыг цэрэгт явахыг шаардсан, явахаас өөр араггүйд хүргэдэг зүйл нь хууль. Хуулийн зүйл заалт, нийгэмд хүрэх зохицуулалт нь залуусыг цэрэгт явахыг шахан шаардсан агуулагтай гэж хэлж болно. Гэвч цэргийн алба хаахаар явах үед хувь хүний асуудлыг зохицуулсан зохицуулалт байхгүй байгаа юм.

Зээлтэй иргэн цэргийн алба хаах асуудлын талаар Монгол банкнаас тодруулахад, "Тухайн зээл олгосон байгууллага гэрээн дээрээ ямар зүйлээр гэрээлсэн байгаа нь их чухал. Зээлийн гэрээн дээр давтагдашгүй хүчин зүйл хэсэгт нь "Цэрэг" гэсэн үг орсон л бол зээлээс чөлөөлнө. Харин ийм үг байхгүй бол зээлээ цаг тухай бүрд нь төлөх шаардлагатай. Манай улсад үүнийг зохицуулдаг нарийн хууль байхгүй" гэлээ.