Ерөнхийлөгчийн Тамгын газрын дэд дарга асан Монголын ардчилсан холбооны Удирдах зөвлөлийн гишүүн Г. Байгалмааг Хөгжлийн банкны хэрэгтэй холбоотойгоор АТГ-аас шалгаж, хэргийг шүүхэд шилжүүлэхээр прокурорт шилжүүлээд байсан. Тэгвэл Нийслэлийн прокуророос Г.Байгалмаад холбогдох хэрэгт яллах дүгнэлт үйлдэж, хэргийг шүүхэд шилжүүлжээ. Түүнд Эрүүгийн хуулийн 18.6-1, 23.2-1 дэх хэсэг буюу мөнгө угаах, хуурамч бичиг баримт үйлдэх, ашиглах гэсэн зүйл заалтаар яллах дүгнэлт үйлджээ. Г. Байгалмааг “Пирамид-Орд” ХХК-ийг Хөгжлийн банкнаас зээл авахад МоАХ-ны газрыг барьцаанд таивих зөвшөөрөл олгосон Ерөнхийлөгч асан Х. Баттулгын гарын үсгийг дуурайлган зурсан мөн хуурамч бичиг баримт үйлдсэн гэх хэргээр шалгаж байсан юм. 

Тодруулбал, “Пирамид-Орд” ХХК нь 2018 оны зургаадугаар сард “Буман залуус 296 айлын орон сууц” барина хэмээн Хөгжлийн банкнаас 15 тэрбум төгрөгийн зээл авсан. Зээлийнхээ барьцаанд Хан-Уул дүүргийн 10 дугаар хороонд байрлах МоАХ-ны нэр дээр бүртгэлтэй 9 мянга гаруй м.кв газрыг тавьсан байдаг. Тухайн үед МоАХ-ны ерөнхийлөгчөөр Х. Баттулга ажиллаж байсан ч банкнаас зээл авах зөвшөөрлийг Г. Байгалмаа нь хуурамчаар үйлдсэн байж болзошгүй нөхцөл байдал илэрсэн юм.