Монгол Улсын Дархан аварга, гавьяат тамирчин А.Сүхбат хулгайн ан хийхээр явж байгаад баригдаж, буу зэвсгээ хураалгасан талаарх мэдээлэл олон нийтийн сүлжээнд цацагдсан.

Тэгвэл бид үүнтэй холбоотойгоор Увс аймгийн Өндөрхангай болон Зүүнхангай сумдын иргэдээс дээрх мэдээллийн талаар асуухад, “Энэ сарын 26-ны /2024.10.26/ өдөр Дархан аварга А.Сүхбат нарын хоёр машинтай арав гаруй хүн Улсын тусгай хамгаалалттай Хан хөхийн нуруунд ан хийхийг завдаж яваад мэргэжилтэн байгаль хамгаалагчдад баригдсан. Байгаль хамгаалагчид тэднээс гурван буу хураан авч сумын цагдаад хэргийг шилжүүлсэн” гэлээ. Мөн ан хийгээгүй учир цагдаа тэднээс хураан авсан зэвсэг зэргийг шалгаж зөрчилгүй байвал зүгээр явуулна гэж эх сурвалж мэдээллээ.

Ард түмэндээ нөлөө бүхий хүн улсын тусгай хамгаалалттай газар хууль бусаар ан хийхийг завдсан уг үйлдэлд олон нийт шүүмжлэлтэй хандаж байна. Хан Хөхийн нуруу нь цөлийн хээрийн бүс нэмэгдэх үйл явцыг хязгаарладаг, экологийн тэнцвэрийг хадгалахад чухал ач холбогдолтой газар. Тус газарт ой мод, ус, гол элбэгтэй. Алмас эрдэнээс эхлээд олон төрлийн эрдэнэстэй бөгөөд эрт дээр үеэс ургамал амьтнаар баялаг гэдгээрээ алдаршсан газар нутаг юм.