Хүчит тэжээлээр хургыг 45 кг жинд хүргэх, загвар төслийг туршиж байна.
Ингэснээр хургыг 45 кг жинд хүргэн борлуулах замаар бэлчээрийн доройтлыг бууруулах боломжтой гэж үзжээ. БОУАӨЯ, ХХААХҮЯ, НҮБХХ-өөс хэрэгжүүлж байгаа “Монголын унаган байгалийн хүлцэл, тогтворжилтыг хангах нь ENSURE” төслийн хүрээнд хурга махлуулж, борлуулах шинэлэг загварыг төслийн сумдад туршихад хавар төллөсөн эх хонинд 45 хоногийн турш өдөрт 250 грамм хүчит тэжээл өгч хурганы намрын амьдын жинг 45 кг хүргэж, борлуулах боломжтойг баталжээ.
Үр дүнд бэлчээрийн ачааллыг 40 хувиар бууруулж, тэжээлийн зардлаа хасаад олох малчдын цэвэр орлогыг олон сая төгрөгөөр нэмэгдүүлэх боломжтой нь нотлогдсон байна. Түүнчлэн мах үйлдвэрлэлийг бууруулалгүйгээр 2023 онд тоологдсон 29.4 сая хонийг 15.3 сая толгой болгож, малаас ялгарах хүлэмжийн хийг 2.7 сая жишиг тонноор бууруулах гарцыг олж харжээ.