“Монгол улс дахь хоригдлын ажил, хөдөлмөрийн нөхцөл байдал тодорхойлох судалгаа”-ны дүгнэлт гарчээ. Энэхүү судалгаанд долоон хорих ангийн 996 хоригдлыг хамруулж, “Яагаад хөдөлмөр эрхэлдэг вэ?” гэсэн асуулт тавьжээ. Дээрх хоригдлуудын 93.1 хувь нь хорих ангид хөдөлмөр эрхэлдэг бөгөөд:

-Ажил хийснээр хорих ялаас хоног хасаж чадах учраас 85.1 хувь

-Цагийг илүү үр дүнтэй өнгөрөөхийг хүссэн учраас 33.7 хувь

-Ажлын ур чадвар эзэмшихийг хүссэн учраас 29.4 хувь

-Цалин хөлс авахыг хүссэн учраас 17.9 хувь

-Ажил хийхээс татгалзах боломжгүй байсан 3.9 хувь нь дээрх хариултуудыг өгчээ. 
Хэрвээ хөдөлмөр эрхэлдэг бол хэр их хугацаа зарцуулж байгаа талаар асуухад, 2-3 хоног гэж хаирулсан нь маш бага байсан байна. Судалгаанд оролцогчдын 46.2 хувь буюу хоёр хоригдол тутмын нэг нь тав хоног ажил эрхэлдэг хэмээн хариулжээ. Хоригдлуудын ажилласан цагаас хамаарч шагналын хоног олгох хуулийн зохицуулалт байдаг бөгөөд, хэрвээ сард 160 цаг ажилласан бол 10 хүртэл шагналын хоног олгодог. Судалгаанаас харахад, хоригдлуудын  90 гаруй хувь нь хөдөлмөр эрхлэх дуртай байгаагаа өөрсдөө хүлээн зөвшөөрдөг байна. Монгол улсын хэмжээнд нээлттэй, хаалттай дэглэмтэй нийт 21 хорих анги байгаагаас 3000 гаруй хоригдол, 1000 гаруй яллагдагч, 300 гаруй баривчлагдсан этгээд байгаа юм.