Цахим орчинд үйлдэгдэх гэмт хэргийн арга нарийсч, улам боловсронгуй болж буйд сэрэмжтэй байхыг ЭЦГ-ын Кибер гэмт хэрэгтэй тэмцэх хэлтсийн дарга, дэд хурандаа С.Тайван анхаарууллаа. Тухайлбал, цагдаагийн байгууллагад өнгөрсөн онд 35 мянган гэмт хэрэг бүртгэгдсэний 8000 орчим нь цахим орчинд үйлдсэн ба дөрвөн гэмт хэргийн нэг нь цахим орчин дахь залилан байгаа аж. Цахим хэрэглээ өссөнийг дагаад энэ мэтийн залилах, бусдын нэр төрд халдах, сэтгэл санаа, бие махбодиор нь хохироох гэмт хэрэг гаарчээ. Хамгийн гол нь цахим орчинд үйлдэж буй гэмт хэргийн 90 гаруй хувийг залилан  эзэлдэг ба нэг цагт нэг хүн хохирдог гэсэн судалгаа гарчээ. 

Манай улсад гэхэд л залилах гэмт хэргийн улмаас 21 тэрбум 900 сая төгрөгийн хохирол учирч, өмнөх оны мөн үеэс 77 хувиар өссөн байна. Ялангуяа Сар шинийн баяр болох гэж байгаатай холбоотой залилангийн гэмт үйлдэл эрс ихэсч гарын бэлгийг зах зээлийн ханшаас доогуур маш хямдаар зарна хэмээн элдэв зураг тавьдаг. Үүнд хүмүүс итгэж, мөнгөө шилжүүлээд алдчихдаг тохиолдол их аж. Тиймээс иргэд цахим орчин дахь худалдах зараас болгоомжилж, эд хөрөнгөөрөө хохирохгүй байхыг ЭЦГ-аас санууллаа.