БСШУ-ны харъяа Монгол-Оросын хамтарсан гуравдугаар сургуулийн захирал асан Ж.Соронзонг Авлигатай тэмцэх газраас албан тушаал эрх мэдлийн байдлаа урвуулан ашигласан хэрэгт буруутган шалгасан. Мөн өөртөө болон бусдад давуу байдал бий болгосон гэх хэргүүдэд яллагдагчаар татах саналыг АТГ-аас өнгөрсөн оны арваннэгдүгээр сард Нийслэлийн прокурорт хүргүүлсэн тухай мэдээлж байв.

Харин Нийслэлийн прокурорын газрын хяналтын прокурор М.Очбадрах АТГ-ын саналыг хүлээн авч, яллагдагчаар татах тогтоол үйлджээ.

Түүнчлэн Ж.Соронзонд хилийн хориг тавьж, нэр бүхий хүмүүстэй уулзахыг хориглосноос гадна түүний гэр бүлийн эзэмшлийн “Эрхга” ХХК-ийн бүх дансыг битүүмжлэх хүсэлтийг прокуророос анхан шатны шүүхэд гаргасныг хангаж шийдвэрлэсэн байна. Нэг үгээр бол, Ж.Соронзонг дөрвөн зүйл ангиар буруутган, яллагдагчаар шүүж, гэм бурууг тогтоохоор болсон байна.