Олон нийтийн сүлжээнд “Учралын” гэгдэх хүний үг хэлэх, үзэл бодлоо илэрхийлэх эрхийг боомилсон хуулийг ихээхэн шүүмжилж буй. Уг хуулиар бол, иргэн хүн өөрийн үзэл бодлоо цахим сүлжээнд илэрхийлснийхээ төлөө эхлээд 100 мянгаар торгуулна. Дараа нь 500 мянгаар торгуулна. Гурав дахь удаагаа зөрчил гаргавал баривчлахаар заажээ. 

Иргэд энэ мэт шийтгүүлээд ирвэл сүүлдээ үзэл бодлоо чөлөөтэй илэрхийлэхээ болино. Төр, засгаа шүүмжилж чадахгүй, эсэргүүцэж өөрийн үзэл бодлоо илэрхийлэхээсээ шантардаг болно. Коммент бичдэггүй ард түмэн болно. Бухимдлаа илэрхийлдэггүй иргэд болно. Ингэснээрээ нийгмийн тэсрэх бөмбөгийг бэлдэж байна  гэдгийг энэ төр, засаг ойлгохгүй нь харамсалтай юм. 

Иргэд сошиалд талбарт үзэл бодол, уур бухимдлаа дураараа гаргадаг. Ингэснээрээ нийгмийн уур бухимдлыг бага ч болов дардаг гэж ойлгож болно. Гэтэл энэхүү эрхийг хуулиар хаачихлаа. Тайван жагслаа гэхэд лайв хийдэг, жагсаал цуглаантай холбоотой юм бичихэд л иргэний сошиал хаягийг шууд хаадаг ийм нөхцөл байдал руу орчихлоо. Дарга нараа шүүмжилдэггүй, иргэд үзэл бодлоо илэрхийлдэггүй нийгэм гэдэг бол дарангуйллын нийгэм бүрдчихсэн гэсэн үг юм.