Таиландын нийслэлийг утаа бүрхэж, агаар бохирдсонтой холбоотойгоор тус улсын Засгийн газар иргэдийг гэрээсээ гаралгүй, зайнаас ажиллахыг уриалжээ.  Мөн хүмүүсийг гадаа гарахдаа амны хаалт зүүж, хувийн автомашинаараа бус нийтийн тээврээр зорчихыг зөвлөжээ. Учир нь, агаарын бохирдлын тодорхой нэг шалтгаан нь дизель автомашины хаягдлаас үүдэлтэй гэж үзэн ийнхүү татгалзахыг хүсчээ. 

Агаарын бохирдлын бас нэгэн шалтгаан нь хаа сайгүй шатаж буй тариалангийн талбай бөгөөд олон мянган фермер ургацын өмнө хөдөө аж ахуйн хаягдлаа шатааж устгадаг цаг үе нь аж. 

Ийнхүү утаа эрс ихэсч, агаар бохирдсоны улмаас өвчлөл огцом нэмэгдсэн тул Бангкок 400 гаруй сургуулийг долоо хоногоор хааж, зарим автозамыг хэсэгчлэн хаасан байна.