*С.Эрдэнийн АН-ын даргын сунгаа өнөөдөр цахимаар болж, намынхаа даргыг тодруулна.

*АН-ын даргын сонгуулийг өнгөрсөн долоо хоногт явуулж, С.Баярцогт, З.Нарантуяа, Л.Гантөмөр нар өрсөлдсөнөөр Л.Гантөмөр дийлэнхийн санал авч, намын даргаар сонгогдсон. Харин өнөөдөр бүртгүүлэхээр Улсын Дээд шүүхэд материалаа өгөх бөгөөд бүртгэж авснаар АН-ын албан ёсны дарга болох учиртай. 

*2022 оны дөрөвдүгээр сард АН-ын даргыг сонгох сунгаа орон даяар өрнөж, Ерөнхийлөгч асан Х.Баттулга, Ж.Батсуурь нар 21 аймгийг тойрон сурталчилгаа хийн өрсөлдсөнөөр намын нийт гишүүний 96,3 хувь нь Х.Баттулгын төлөө санал өгч байв. Харин Улсын Дээд шүүх албан бус хэмээн Х.Баттулгыг бүртгэж аваагүй билээ. 

Ар араасаа үргэлжилж буй дээрх үйл явдлууд АН завхарсныг намынх нь нэр хүнд шалдаа унасныг гэрчилнэ. АН ярихаар хэнийх нь гэх. Хэнийх нь ч байсан чадамжгүй, үнэт зүйлгүй болсноо тэд хүлээн зөвшөөрч чадахгүй, байсхийгээд л уйддаг юм уу хаашаа юм, АН-ын даргыг сонгох сонгууль, сунгаа явуулж “даажигнадаг” боллоо. Юуны сөрөг хүчин, тийм чадамжгүй болсон.

Энэ байдалд иргэд байтугай АН-ын гишүүдийн толгой бүр эргэж гүйцсэн. Анх Х.Баттулга боллоо гэж туг дарцаг болон хөөрцөглөж байлаа. Удалгүй АН-ын ҮБХ-ноос зохион байгуулсан санал хураалтаар Лу.Гантөмөр  илүү оноогоор ялж, алга ташицгааж байв. Харин өнөөдөр С.Эрдэнийн АН-ын нөхөд даргаа сонгох сунгаагаа цахимаар явуулна. Харин өнөөдрийн АН-ын даргын цахим сунгаанд, 

1. УИХ-ын гишүүн, УИХ дахь АН-ын бүлгийн дарга, АН-ын ҮБХ-ны дарга Д.Ганбат,
2. Ардчилсан намын Үндэсний Бодлогын Хорооны гишүүн Т.Энхсайхан,
3. Ардчилсан намын ҮБХ-ны Ёс зүй сахилга хариуцлагын бодлогын хорооны дарга Д.Ганбаяр,
4. Ардчилсан намын Ерөнхий нарийн бичгийн дарга Д.Эрдэнэсувд,
5. Баянгол дүүргийн Ардчилсан намын дарга, АЗХ-ны тэргүүн, Баянгол дүүргийн ИТХ-ны төлөөлөгч Н.Болдбаатар
6. Чингэлтэй дүүргийн Ардчилсан намын дарга, Чингэлтэй дүүргийн ИТХ-ын төлөөлөгч Ж.Сугарсүрэн,
7. Ардчилсан намын ҮБХ-ны гишүүн Л.Гүндалай нар нэрээ дэвшүүлээд байна. 
С.Эрдэнийн АН-аас өгч байгаа мэдээллээр "Дүрмийн дагуу нэр дэвшигчдээс хамгийн олон санал буюу оноо авсан нэр дэвшигчийг Ардчилсан намын Их хурлаас батламжилсан тогтоол гаргаж, Улсын Дээд шүүхэд бүртгүүлэх хүсэлтээ гаргана" гэлээ. 

Улсын Дээд шүүх Л.Гантөмөрийг өнөөдөр АН-ын даргад бүртгэж авах эсэх, мөн С.Эрдэнийн даргын цахим сунгаа хэрхэн болж өнгөрч, даргаар хэнийгээ сонгох гээд тус намыг тойрсон чих дэлдийлгэм үйл явдлууд ид өрнөж байна.