Ерөнхийлөгч асан Ц.Элбэгдорж ийнхүү асууж, бухимдлаа илэрхийллээ. Тэрбээр “Юу болоод байна. “Сошиал орчинд хүний эрхийг гавлах” хууль. Ард түмэн баталчих, тэгээд баялгаа ав гэсэн Үндсэн хуулийн төсөл. Тэнэглэлд хязгаар байна уу. Ерөнхийлөгч, Ерөнхий сайд байсан хүмүүсийг шууд УИХ-ын гишүүн болгоно гэсэн үү. Эхлээд нэг юм хэлчихье. Би гишүүн болмооргүй байна” хэмээн дургүйцлээ илэрхийллээ.

Үнэндээ Н.Энхбаяр “Бид ард түмэндээ бэлэг барьж, шинэ Үндсэн хуулийн төслийг өргөн барьсан” хэмээн өчигдөр мэдэгдсэн. Харин эсрэгээрээ улстөрчдөд, төрийн өндөр албан тушаалтнуудад, бүр өөртөө бэлэг барьчихсан юм биш үү. Далдуур, хойгуур хийсэн бүхнээ ард түмнийхээ төлөө хэмээн уянгалдаг Н.Энхбаярын өргөн барьсан төсөлд Монгол Улсын Ерөнхийлөгч, Ерөнхий сайд байсан хүмүүс ногоон гэрлээр УИХ-ын гишүүн болно гэчихжээ. 
 

Насаараа УИХ-ын гишүүний суудалд тухлах санаархлаа ийнхүү шинэ Үндсэн хуулийн төсөлдөө тод томруунаар шингээжээ.