Завхан аймгийн Улиастай сумын Богдын гол багийн Өндөр толгой хэсэг “Богдын гол”-ын усны халиа үүсэж, айлын гэр, автомашин усанд автсан дуудлагыг нэгдүгээр сарын 26-ний өдрийн 19.10 цагт аймгийн Онцгой байдлын газрын Эрэн хайх, аврах бүлгийн алба хаагчид хүлээн авчээ. Алба хаагчид шуурхай ажилласнаар иргэн Г-ийн таван ханатай гэр, М.-ийн зургаан ханатай гэр усанд автсан байсныг нүүлгэн шилжүүлж, “Трак” маркийн таван тонн-ы  даацтай автомашиныг 3.12 цаг ажиллаж, татан гаргасан байна. 

Энэ мэт усны халиатай хэмээн анхааруулсан газар айл өрх дур мэдэн бууснаас усанд автах тохиолдол гарсаар байна. Хамгийн сүүлд гэхэд л, нийслэлийн Баянзүрх дүүрэгт айлууд усанд автан, тэр нь хөлдөн ОБЕГ олон цагаар ажиллаж байж хүмүүсийг гэр оронтой нь нүүлгэн шилжүүлж байсан билээ. Хүнд даацын автомашинаар мөсийг түрж, халиа тошио үүссэн газарт хүч тавин ажилласан ба нийт хохирол 330 саяар тооцогдож байсан билээ. Тиймээс хориглосон газарт айл, өрхийг дураараа буухгүй байхыг ОБЕГ сэрэмжлүүллээ.