Н.Учралын гэгдээд байгаа “Олон нийтийн сүлжээнд хүний эрхийг хамгаалах тухай” хуульд бүтэн болон хэсэгчлэн хориг тавих хугацаа өнөөдрөөр дуусгавар болж байна. Нэг үгээр, Монгол Улсын Ерөнхийлөгчийн тоолуур нэгдүгээр сарын 23-ны өдрөөс гүйж эхэлсэн бөгөөд өнөөдөр дуусах юм. Н.Учрал сайд хуулийн төслөө нэгдүгээр сарын 20-ны баасан гарагт яаравчлан батлуулсан бөгөөд Ерөнхийлөгч ажлын таван өдөрт багтаан батлах уу, хориг тавих уу гэдгээ эцэслэн шийдэх учиртай. 

Н.Учралын хууль шиг ийнхүү гэрлийн хурдаар баталсан хуулийн төсөл энэ парламент байтугай өмнөхөд ч байгаагүй. Энэхүү хуулийг Хууль тогтоомжийн тухай хуулийг зөрчин, ердөө 72 цагийн дотор баталсан юм. Хүүхдийн эрхээр халхавчлан тайлбарлаж байгаа уг хуулийн цаана улстөрчдийг хамгаалсан, хаацайлсан, иргэд үзэл бодлоо илэрхийлснийхээ төлөө торгуулах, бүр баривчлах хүртэл хатуу зүйл заалттай. 

Өнөөдөр Монгол Улсын Ерөнхийлөгч ард түмнийхээ талд уу, эс бөгөөс өөрт нь зориулсан хууль уу гэдэг нь тодорхой болно. Учир нь, Н.Учрал Ерөнхийлөгчид тал засаж, уг хуулийн төслийг санаачилсан. Түүнд барьсан бэлэг гэдгийг АН-ынхан хэлсэн. 

Ерөнхийлөгчийн тоолуур гүйгээд эхэлсэн. Харин өнөөдөр сүүлчийн өдөр...