С.Эрдэнийн талын зохион байгуулсан АН-ын даргыг сонгох цахим сунгаанд УИХ-ын гишүүн Д.Ганбат 21027 саналаар ялжээ. Харин өөртөө ихээхэн итгэлтэй байсан УИХ-ын гишүүн асан Л.Гүндалай 17828 хүний санал авч удаалжээ. Харин тэрбээр цахим хуудсаараа дамжуулан ийн мэдэгдлээ. Тэрбээр "Сая АН-ын даргыг сонгох сунгаанд оролцлоо. Ардчилсан нам ч одоо олон даргатай болчихоод байгаа юм. С.Эрдэнийн тал гэнэ үү, С.Эрдэнийн АН гэнэ үү сонгуулиа явуулсан. Түүнд нь би бас оролцоод ялагдчихлаа. Ялагдах нь ч яах вэ. Би бол ялж, ялагдаж явахыг мэддэг учраас нэг их тоогоод байх зүйл биш. Гэхдээ луйвар, булхайгаар ялагдах жаахан сонин юм байна.
Хамгийн гол нь эхлээд цахимаар санал хурааж байна гээд хувийг нь танилцуулаад л байсан. Тэгээд яг 12 цагт хаагаад л бүх юм харанхуй алга болчихсон. Том зааланд хүлээгээд сууж байтал дотоод сонгуулийн хорооныхон гэнэтхэн нэг бичиг авчирч ирснээ нэр дэвшигчдийн авсан саналыг гаргаж ирээд уншчихаж байна билээ. Үүнийг би гайхаад байгаа. Саналын дүнг бидэнд харуулаагүй. Тусгай өрөөнд Дотоод сонгуулийн хорооныхон дүнгээ харж, хурлаа хийж, гарч ирээд л Д.Ганбатыг 21027 хүний санал авч ялсан учраас даргаар сонгож байгаагаа хэлсэн.
Миний бие 18 мянга орчим хүний санал авсан гэсэн байх. Гэвч энэ нь Д.Ганбатынхаас 4000 хүнээр дутуу байсан. Ямартай ч, би саналын дүнд итгэхгүй байна. Учир нь, тэнд юу болж байгааг огт үзүүлээгүй.Эцэст нь хэлэхэд "Бидон" Д.Ганбат С.Эрдэнийн АН талаас сонгогдож байгаа юм байна” гэлээ.