Ардчилсан намын XVI Их хурал үргэлжилж байна. Хурлын гол үйл явдал нь цахим сунгаанд ялалт байгуулсан Д.Ганбатыг өнөөдөр албан ёсоор батламжилж, Улсын Дээд шүүхэд бүртгүүлэх хүсэлтээ маргааш илгээх юм.
С.Эрдэнэ Их хурлыг нээж хэлсэн үгэндээ, "Яаж ч үгүйсгээд АН бол Монголд хүний эрх, эрх чөлөө, ардчиллын дуу хоолой болж, салхийг хагалж гарч ирсэн улс төрийн хүчин гэдгийг хэн ч үгүйсгэж чадахгүй. Бид 100 жилийн түүхгүй ч, 30 жилийн түүхээрээ Монголын бүхэл бүтэн нийгмийг өөрчилж чадсан. Өнөөдөр залуучууд социализмыг магтан дуулаад эхэлсэн. Ийм байдлаар залуучуудын тархийг угааж, итгэл үнэмшлийг байхгүй болгох гэсэн эрх баригчид "коммунистуудын" увайгүй үйлдлийг бид таслан зогсоох ёстой.
Бид удахгүй болох бүх шатны сонгуульд бэлдэх, түүнд хариуцлагатай оролцохын тулд АН-аа эмхлэн байгуулах цаг болсон. Ардчилсан нам тарж бутарсан мэтээр мөрөөдөж, зүүдэлж явсан хүмүүст бид энэ удаад амьд гэдгээ мэдэгдэж, зохих хариуг нь өгч чадлаа. Бид байгаа. Байсаар ч байх болно" хэмээв.