Ерөнхийлөгчийн Тамгын газраас Н.Учралын хуульд хориг тавьсантай холбогдуулан өнөөдөр мэдээлэл хийнэ. Хориг тавьснаар ирэх хоёрдугаар сарын 1-нээс хэрэгжүүлж эхлэх байсан Олон нийтийн сүлжээнд хүний эрхийг хамгаалах тухай хуулийн хэрэгжилт ийнхүү түр түдгэлзээд байна.
УИХ-ын чуулганы хуралдааны Дэгийн тухай хуулийн 88.1-т "Хууль, тогтоолд Монгол Улсын Ерөнхийлөгч хориг тавьсан бол Улсын Их Хурал хоригийг чуулганы үеэр ажлын 14 хоногийн дотор, чуулганы чөлөөт цагт хориг тавьсан бол ээлжит болон ээлжит бус чуулган эхэлснээс хойш 10 хоногийн дотор хэлэлцэн шийдвэрлэж, тогтоол батална" хэмээн заасан. 
УИХ-ын хаврын чуулган ирэх гуравдугаар сарын 15-нд нээлтээ хийнэ. Тэгэхээр ээлжит бус чуулган хуралдуулж, хоригийг хэлэлцэхээс аргагүйд хүрч байна.
Гэвч хоригийг УИХ хүлээж авах эсэх нь эргэлзээтэй. Эх сурвалжийн мэдээлж буйгаар, УИХ нэгэнт гаргасан шийдвэртээ бат зогсоно. Хоригийг хүлээж авахгүй гэдэг байр суурьт нэгдэхээр тохиролцсон гэх. Хуульд зааснаар бол, Байнгын хорооны болон нэгдсэн чуулганы хуралдаанд оролцсон гишүүдийн гуравны хоёр буюу 66,6 хувь  нь Монгол Улсын Ерөнхийлөгчийн хоригийг хүлээж аваагүй бол хууль, тогтоол хүчин төгөлдөр хэвээр үлдэх юм.