НАМЭХ-ны Бага хурал Тусгаар тогтнолын ордонд өнөөдөр хуралдана. НАМЭХ Бага хурлаа оны өмнө хийхээр төлөвлөсөн боловч намын дотоод асуудал, хагаралтай байдлаас шалтгаалан тодорхойгүй хугацаагаар хойшилсон юм. Тодруулбал, 2022 оны арванхоёрдугаар сарын 1-ний өдөр НАМЭХ хурлаа хийхээр төлөвлөсөн байсан ба энэхүү хурлаар Нийгмийн Ардчилал Монголын Эмэгтэйчүүдийн холбоо гэх нэрээ Социал Демократ Эмэгтэйчүүдийн холбоо болгон өөрчлөхөөс гадна тэргүүнээ солихоор тохирсон байв. 
Ерөнхий сайдын зүгээс холбоог Соёлын сайд Ч.Номинд өгөх тохироог хийж, харин одоогийн тэргүүн Д.Сарангэрэл албан тушаалаа өгөхгүй, үргэлжлүүлэн ажиллана хэмээн зөрүүдэлж, энэхүү талцлаас болж, НАМЭХ хурлаа хойшлуулахаас аргагүйд хүрч байлаа. Мөн Д.Сарангэрэл тэргүүний талд гараа өргөх бүсгүйчүүд цаг уурын ноцтой байдлын улмаас хөдөө, орон нутгаас ирж амжаагүй нь хурлыг хойшлуулах бас нэгэн шалтгаан болсон билээ. 
Д.Сарангэрэл гишүүний хувьд суудлаа алдахгүйгээр эмэгтэйчүүдийн холбоогоо удирдаж, 2024 оны сонгуульд орох нь чухал юм. Тэгж чадвал намын жагсаалтын айргын тавд бичигдэхээс гадна гишүүний квотоо өвөртөлчихлөө л гэсэн үг. Түүнийг Ерөнхийлөгч У.Хүрэлсүх дэмжиж байгаа бол Ч.Номин сайдыг Ерөнхий сайд, харин шинэхэн сайд Х.Булгантуяаг Генсек зүтгүүлж буй. Тиймээс зөвхөн НАМЭХ-ны тэргүүний төлөөх өрсөлдөөн бус төрийн өндөрлөгүүдийн улс төрийн хоорондын тэмцэл болон өргөжөөд байна.
Ч.Номин сайдыг залуу үеийн төлөөлөл хэмээн дэмжигчид олон байгаа бол Д.Сарангэрэл гишүүнийг залуу үедээ зайгаа тавьж өг гэх эсэргүүцлийн мессеж ч их явна. Харин энэ дундаас Х.Булгантуяа гараад ирэх магадлалтай л юм.