НҮБ-ын Хүүхдийн сангийнхан цас зудын байдалтай байгаа баруун аймгийн зарим сумдад ажиллаж, нөхцөл байдалтай танилцаж, газар дээр нь тодорхой дэмжлэг үзүүлсэн байна.
Аймаг, орон нутгийн захиргаа, малчид хамтран өвөлжилтийн бэлтгэл хангасан хэдий ч энэ өвөл урьд жилүүдээс илүү хүйтэрсэн, зун ногооны гарц муу гантай байсантай холбоотойгоор өвөлжилт хүндрэхэд нөлөөлсөн тухай малчид ярьж байна.
Зудад өртсөн малчдад эрүүл мэнд болон бусад тусламж үйлчилгээг цаг алдалгүй хүргэхэд автомашин техник, шатахуун түлш, эм, өвс тэжээл зайлшгүй хэрэгтэй. Ялангуяа малчдын хүүхдүүдэд дулаан гутал хувцас, эм, витамин хэрэгтэй байгаагаас гадна алслагдсан орон нутгийн сурагчид сургуульдаа ирж чадахгүй улмаар хичээл, цэцэрлэгээсээ завсардах эрсдэлтэй тулгарчээ. 
Тиймээс НҮБ-ын Хүүхдийн сангаас хамтрагч байгууллагууд болон иргэд, олон нийтийг зудад өртсөн айл өрх, хүүхдүүдэд туслалцаа үзүүлэхийг уриаллаа.