Замын-үүд-Эрээний автозамын боомтын зорчигч тээврийн хөдөлгөөнийг 2023 оны нэгдүгээр сарын 8-ны өдрөөс нээхээр болсон. БНХАУ-ын талаас хилийн боомтоор зорчигч болон тээврийн хэрэгсэл нэвтрүүлэхэд зарим шаардлагуудыг тавьсны дотор өдөрт 300 зорчигчийг автобусаар нэвтрүүлнэ, зорчигч нь ухаалаг утас ашиглан Хятадын гаалийн аппликэйшнийг англи, хятад хэлээр бөглөх, эсвэл цаасан хэлбэрээр Монгол хэлээр бөглөсөн байх шаардлагатай гэжээ. Хилээр нэвтрэх иргэд зорчигч болон тээврийн хэрэгслийг цаашид үе шаттайгаар нэмэгдүүлэх юм байна. Зорчигчид 48 цагийн ПСР шинжилгээ хийлгэсэн, хариу сөрөг байх шаардлагатай бөгөөд хариу нь эерэг гарсан болон халуурсан шинж тэмдэгтэй бол хилээр нэвтрүүлэхгүй гэжээ. Мөн УАЗ -469 машиныг өнгө үзэмж, аюулгүй байдал зэрэг талаасаа тус улсын стандартыг хангахгүй учраас хил хоорондын тээврийн хэрэгслийн үйлчилгээнд зорчуулахгүй гэдгээ мэдэгджээ.