С.Эрдэнийн талын АН гишүүдийнхээ дунд даргаа сонгох цахим сунгаа явуулж, өнгөрсөн амралтын өдрүүдэд дүнгээ гаргасан билээ. Энэ удаад УИХ-ын гишүүн Д.Ганбат 22 мянга гаруй гишүүний саналаар АН-ын дарга болж, үнэмлэхээ гардан авсан юм. Өөртөө дэндүү итгэлтэй байсан Л.Гүндалай  “Луйвар булхайгаар ялагдана гэдэг сонин юм байна” хэмээн сэтгэгдлээ хуваалцсан. Тэрбээр 18 мянга гаруй гишүүний санал авч, удаалсан юм.

Өдгөө Улсын Дээд шүүх АН-ын даргад хэнийг нь бүртгэхийг харах л үлдээд байна. АН-ын Үндэсний бодлогын хорооны хурлаар даргаар сонгогдсон Лу.Гантөмөр бүртгүүлэх материалаа Дээд шүүхэд өгсөн. Харин одоо Д.Ганбат өгнө. Улсын Дээд шүүх АН-ын даргын энэ маргааныг дорвитойхон нэг таслахгүй бол энэ нам цаашид ч хуралдсаар, даргаа сонгосоор 2024 оны УИХ-ын сонгууль хүрэх нь тодорхой байна.

Энэ удаад С.Эрдэнэ гэнэдэхгүйгээр тамга тэмдгээ яаран яаран Д.Ганбатад өгчихөөгүй. Өмнө нь олон ч удаа өгөлцөж, авалцаж байсан учраас хашир загнасан бололтой. Хэрвээ Улсын Дээд шүүх Д.Ганбатыг АН-ын даргад бүртгэхгүй тохиолдолд тамга, тэмдгээ эгүүлэн авах гэж баахан чирэгдэл болно. Хашир хүн гэж хаширсан хүнийг л хэлдэг гэж үнэн юм.