Дарханы замын хэрэгт холбогдсон албан тушаалтнуудын хэрэгт нийслэлийн Прокурорын газраас яллах дүгнэлт үйлдэж, шүүхэд шилжүүллээ. Тодруулбал, Дарханы замын тендерийг шалгаруулсан албан тушаалтнуудыг АТГ-аас шалгаж, ЗТХЯ-ны Зам ашиглалтын газрын дарга асан Х.Оргил-Эрдэнэ, Зам тээврийн яамны дэд  сайд Ж.Бат-Эрдэнэ нарт холбогдох хэргийг прокурор хянаж дуусчээ.

Х.Оргил-Эрдэнийн хувьд 2019 онд БНХАУ-ын хөрөнгө оруулалттай “Хэйлонжиан жиньеи рөүд энд бридж” ХХК-ийн ажилтнаас 20 мянган  юаны авлига авч байгаад газар дээрээ баригдсан юм. 

Харин дэд сайд Ж.Бат-Эрдэнийг албан тушаалаа урвуулан ашиглаж, Улаанбаатар-Дархан чиглэлийн авто замын бүтээн байгуулалтын ажилд бусдад давуу байдал бий болгосон, мөн үндэслэлгүй хөрөнгөжсөн гэх үндэслэлээр АТГ-аас шалгасан. Түүний хөрөнгө 2020 онд 100 сая хүрэхгүй байснаа ганцхан жилийн дотор буюу 2021 онд 800 гаруй сая төгрөгийн орлого олсноо хөрөнгө, орлогын мэдүүлэгтээ тусгасан байдаг. Ийнхүү орлого нь огцом өссөн нь шалгах үндэслэл болсон бөгөөд өөрөө ч хөрөнгийнхөө эх үүсвэрийг тайлбарлаж чадахгүй  байсан тул үндэслэлгүйгээр хөрөнгөжсөн хэрэгт шалгахаар болсон юм.