Улс орны нийгэм эдийн засгийн тулгамдсан  асуудлыг иргэдийн туслалцаатайгаар тодорхойлох, асуудлын эрэмбэ, шийдвэрлэх арга зам, гаргах шийдвэрийн талаар иргэдтэй зөвлөлдөх, үндэсний зөвшилцлийг хангах зорилготой “Зөвлөлдөж шийдье” зөвлөлдөх санал асуулгын нэгдэх шат нэгдүгээр сарын 26-ны өдрөөс орон даяар эхэлсэн юм.
Зөвлөлдөх санал асуулга хоёр шаттай бөгөөд нэгдүгээр шатны мэдээлэл цуглуулалт 2023 оны хоёрдугаар сарын 2-нийг хүртэл зохион байгуулна.

Санал асуулгын нэгдэх шатанд урьдчилсан мэдлэг, мэдээлэл өгөхгүйгээр санал асуулгын хуудсаар саналыг нь авна. Үүнд, Монгол Улсын 18 насанд хүрсэн иргэн оролцох эрхтэй бөгөөд улсын хэмжээнд 1570 иргэнийг нэгдүгээр шатны мэдээлэл цуглуулалтад хамруулж буй.
Зөвлөлдөх санал асуулгын агуулга нь зургаан бүлгээс бүрдэх юм. Үүнд,

-Иргэний болон улс төрийн эрх, хариуцлага,
-Парламентын ардчилал,
-Эдийн засаг, баялгийн сан, төвлөрлийг сааруулах,
-Нийгмийн тулгамдсан асуудал,
-Бусад гэсэн агуулгын хүрээнд нийтдээ 30 асуулт боловсруулж, 0-10 хүртэл оноогоор үнэлнэ. 
Түүнчлэн Зөвлөлдөх санал асуулгад оролцсон иргэдэд ҮСХ-ноос талархлын бичиг, 10000 төгрөг өгч байна.