Засгийн газрын өнөөдрийн хуралдаанаас Орхоны хөндийд Шинэ Хархорум хот байгуулах ажлыг эрчимжүүлэх чиглэлээр хоёр шийдвэр гаргасан талаар Барилга, хот байгуулалтын сайд Ц.Даваасүрэн мэдээлэл өглөө. Үүнд, нэгдүгээрт, шинэ Хархорум хотыг байгуулах ажлыг удирдан чиглүүлэх Үндэсний хороо байгуулахаар болж, хороог БХБ-ын сайд Ц.Даваасүрэн ахалж, бүрэлдэхүүнд нь холбогдох яамдын сайд, дэд сайд нар багтах аж. Хоёрдугаарт, шинэ Хархорум хотын бүтээн байгуулалтын захиргааг байгуулж. захиргаа мэргэжлийн удирдлага, зохион байгуулалт, менежментээр хангах юм байна. 
 
Цаашлаад, Хархорум хотын инженерийн геодезийн судалгааг хийж, газрын бүтэц, хөрс, ус цаг уурын нөлөөлөл, газар хөдлөлтийг судалж байгаа аж. Энэхүү судалгааны дараа хот байгуулах байршлыг тогтооно. Үүний дараа орон зайн бүсчлэл, инженерийн дэд бүтэц зэргээр хотын ерөнхий төлөвлөлтийн ажил руу орох ба бүтээн байгуулалтын ажлыг Ерөнхийлөгчийн ордноос эхлэн хийж, засаг захиргааны байгууллагуудыг байршуулна гэсэн мэдээллийг салбарын сайд өглөө.