Засгийн газраас 2023-2025 оныг “Монголд зочлох жил”-ээр зарласантай холбогдуулан Европын 32 улс, Австрали, Шинэ Зеландын иргэдэд визийн хөнгөлөлт үзүүлнэ 

Засгийн газраас 2023, 2024, 2025 оныг “Монголд зочлох жил”-ээр зарласантай холбогдуулан Монгол Улсад жуулчлахаар 30 хүртэлх хоногоор ирэх гадаадын 34 улсын иргэдийг дээрх гурван жилийн хугацаанд визийн шаардлагаас чөлөөллөө. Энэхүү шийдвэрийг Засгийн газрын өнөөдрийн хуралдаанаас гаргасан ба дэлхийн өндөр хөгжилтэй Европын 32 улс болон Австрали, Шинэ Зеланд хамаарч байна. 
Эдгээр нь манай улсад ажил, аяллын шугмаар олонтаа ирдэг, мөн 2021 оны аравдугаар сард нэвтрүүлсэн www.evisa.mn системээр Монгол Улсын визийг цахимаар авч буй улс юм. Визийн шаардлагаас чөлөөлснөөр аялал, жуулчлалын салбарыг хөгжүүлэх, эдийн засгийг сэргээх, Монгол Улсын иргэдийн зорчих нөхцөлийг хөнгөвчлөх талаарх яриа хэлэлцээг үргэлжлүүлэхэд ач холбогдолтой гэж үзсэнээс энэхүү шийдвэрийг гаргажээ.