Нийслэлийн Боловсролын газар цар тахлаас үүдэлтэй сурагчдын хичээлийн хоцрогдлыг нөхөх ажлын хүрээнд танхим болон цахимаар хосолсон нэмэлт сургалт явуулах, хөтөлбөрийн агуулгыг ахиулах ажил төлөвлөсөн байна. Энэ хүрээнд сургууль, цэцэрлэгийн хүртээмжийг нэмэгдүүлэх шаардлагатай байгаа бөгөөд тус ажлыг энэ онд багтаан шийдвэрлэнэ гэдгийг Нийслэлийн ИТХ-ын Хүний хөгжлийн хороо, Нийслэлийн Боловсролын газрын хуралдаанаар хэлэлцлээ. 

Нийслэлийн хэмжээнд 20 орчим сургуулийн ачаалал, даац хэтэрсэн байна. Тодруулбал эдгээр асуудал үүссэн сургуулиудын нэг бол 153 дугаар сургууль юм. Тус сургууль нь нийт 960 хүүхдийн суудалтай. Гэвч ашиглалтын шаардлага хангахгүй болсон 12 дугаар сургуулийн сурагчид мөн дээрх сургуульд суралцах болжээ. Ингэснээр хоёр сургуулийн нийт 2500 гаруй хүүхэд суралцаж байхад, 153 дугаар сургуулийн сандал, ширээ, бусад хэрэглэгдэхүүнүүдийг 960 хүүхдийнхээр бодож, төсөв олгоогүй байна. Улмаар сурагчид сурч боловсрох орчноор хязгаарлагдаж, багш нар хэт олон хүүхэдтэй ажиллахад бэрх болжээ.