Зүүн Энэтхэгийн Ассам мужийн цагдаагийн газар насанд хүрээгүй охидыг гэрлүүлэх явдалтай тэмцэх томоохон ажиллагааг эхлүүлж, 1,800 гаруй хүнийг нэг шөнийн дотор баривчилжээ.
Пүрэв гарагийн шөнө эхэлсэн ажиллагааны үеэр насанд хүрээгүй охидтой гэрлэсэн болон гэрлэхэд зуучилсан, гэрлэлтийг бүртгүүлсэн зэрэг холбогдох бүх этгээдийг баривчилсан юм байна.
Энэтхэг улсын хуулиар 18 нас хүрээгүй хүнтэй гэрлэхийг хориглодог. Гэхдээ энэ хууль бараг хэрэгждэггүй юм байна.
Энэтхэг улсад одоо насанд хүрээгүй байхдаа бусадтай хүчээр гэрлэсэн 223 сая эмэгтэй байгаа гэж НҮБ тооцоолсон байдаг. Энэ бол дэлхийд тэргүүлэх өндөр үзүүлэлт юм.
2020 онд нийтлэгдсэн Юнисефийн тайланд Энэтхэгт жил бүр 1.5 сая орчим бага насны охид богтлогддог тухай дурдсан байдаг.
2015-2020 оны хооронд Энэтхэгийн хууль сахиулагчид 200,000 орчим ийм гэрлэлтийг таслан зогсоож байв. Энэтхэгийн засгийн газраас 2019-2021 онд 635,000 өрхийг хамруулсан судалгаа явуулахад 15-19 насны охидын 6.8 хувь нь жирэмсэлсэн байжээ. Мөн энэ судалгаанд оролцсон 20-24 насны эмэгтэйчүүдийн 23.3 хувь нь 18 нас хүрэхээсээ өмнө гэрлэснийг тогтоосон байна.
“Насанд хүрээгүй хүмүүсийг гэрлүүлэх нь эх хүүхдийн эндэгдэл өндөр байх үндсэн шалтгаан болдог. Муслим, хиндү, загалмайтан зэрэг бусад бүх шашин шүтлэгтэй эрчүүд энэ удаагийн ажиллагааны үеэр баривчлагдсан” гэж Ассам мужийн захирагч Химанта Бисва Сарма мэдэгджээ.
Тэрбээр энэ чиглэлд хууль сахиулах ажиллагааг цаашид тогтмол хэрэгжүүлж, насанд хүрээгүй хүмүүсийг гэрлүүлэх явдалтай тууштай тэмцэхээ амласан байна.