УИХ-ын Хянан шалгах түр хорооноос зохион байгуулж буй  шинжлэн судлах хоёрдахь шатны нээлттэй сонсгол Төрийн ордонд өнөөдөр эхэлсэн. Нээлттэй сонсголоор эрх бүхий байгууллагуудын шалгалтын тайлан, тэдгээрийн зөвлөмжийн үр дүн, Хөгжлийн банкны охин компани болох “Ди Би Эм лизинг” ХХК-иас олгосон зээлүүдийг  хэлэлцэхээр төлөвлөсөн юм.  Нийт 59 гэрчийг дуудуулаад байгаа ба тэднээс УИХ-ын гишүүн, Сангийн сайд Б.Жавхлан, Эрчим хүчний сайд Б.Чойжилсүрэн /Сангийн сайдын алба хашиж байсантай нь холбогдуулж гэрчээр дуудсан/ УИХ-ын гишүүн, Хөгжлийн банкны захирал асан Г.Амартүвшин, Монголбанкны Ерөнхийлөгч Б.Лхагвасүрэн, Монголбанкны Хяналт шалгалтын газрын даргаар ажиллаж байсан Н.Батсайхан, Монголбанкны Хяналт шалгалтын ахлах байцаагч Ө.Тайван нар ирсэн байна.

Мөн Хөгжлийн банкны гүйцэтгэх захирал асан Н.Мөнхсүх, Хөгжлийн банкны эрсдлийн удирдлагын газрын дарга асан О.Батбаатар, Г.Дөлгөөн нар иржээ. Харин Монголбанкны Ерөнхийлөгчөөр ажиллаж байсан Н.Золжаргал эрүүл мэндийн шалтгаанаар оролцох боломжгүй гэсэн бол Монголбанкны Ерөнхийлөгч асан Н.Баяртсайханыг гэрчээр дуудсан ч холбогдож чадаагүй, АНУ-д амьдарч байгаа гэх мэдээлэл байгаа аж. Цаашлаад Хөгжлийн банкны захирал асан Б.Батбаяр гэрчээр дуудсан ч хуулийн байгууллагад мэдээллийн нууцыг задлахгүй байх баталгаа гаргаж өгсөн тул оролцох боломжгүй гэж тайлбар ирүүлсэн бол Хөгжлийн банкны дэд захирал Я.Сод-Эрдэнэ АТГ-т яллагдагчаар татан шалгуулж байгаа тул нээлттэй сонсголд оролцох боломжгүй.

Хөгжлийн банкны ТУЗ-ийн дарга асан М.Баярмагнай АТГ-т шалгуулж байгаа тул гэрчээр оролцох боломжгүй гэдэг тайлбар тус, тус ирүүлжээ. Ташрамд, Аудитын байгууллагаас Хөгжлийн банкинд шалгалт хийгээд  гурван их наяд төгрөг, 341.5 сая ам.доллар, 168 сая иен бүхий ноцтой зөрчлийг илрүүлсэн байна. Нээлттэй сонсгол үргэлжилж байна.