Монгол Улсын Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явц, байдлыг хянан шалгах түр хорооны Нотлох баримтыг шинжлэн судлах хоёрдахь шатны сонсголын үдээс хойшхи хуралдаанаар Хөгжлийн банкны охин компани болох “Ди Би Эм лизинг” ХХК-иас АСЕМ-ийн автобусны санхүүгийн түрээсийн санхүүжилтийг хэлэлцэж байна.
“Ди Би Эм лизинг” ХХК нь Сангийн яамтай Улс хот хоорондын нийтийн тээврийн үйлчилгээнд дэмжлэг үзүүлэх төслийн хүрээнд дамжуулан зээлдүүлэх санхүүжилтийн гэрээ байгуулжээ. АСЕМ-ын зочдод үйлчлэх зориулалтаар БНСУ-ын хөнгөлөлттэй зээлээр 43 автобусыг нэг бүрийг 126 мянган ам.доллараар нийт 5.5 сая ам.доллараар худалдан авсан байна.
АСЕМ-ын зочдод үйлчлэн, үйлчилгээнд 14 хоног ашигласан дээрх 43 автобусыг 2017 оны арваннэгдүгээр сарын 16-ны өдрийн Сангийн яамны тоот бичгээр нэгж бүрийн үнэлгээг 44 сая төгрөг, нийт 1.9 тэрбум төгрөгөөр бууруулж, дамжуулан зээлдүүлсэн байна. Энэ нь Өрийн удирдлагын хуулийн заалтыг хэрэгжүүлээгүй хэмээн дүгнэснээ шинжээч танилцууллаа. Эдгээр 43 автобуснаас “Ди Би Эм лизинг” ХХК-д 40-ийг нь хүлээлгэн өгч, гурвыг нь өгөөгүй тул гэрчээс тодруулах шаардлагатай гэж үзлээ.