УИХ-ын Хянан шалгах түр хорооны хоёрдахь удаагийн сонсголд УИХ-ын гишүүн, Хөгжлийн банкны захирал асан Г.Амартүвшин гэрчээр оролцож, тайлбар мэдүүлэг өглөө. Тэрбээр гэнэ талаараа ийн  байр сууриа илэрхийллээ. “Хөгжлийн банкны асуудлаар Нотлох баримтыг шинжлэн судлах хоёр дахь шатны сонсгол өнөөдөр болж байна. 2019 оны зургаадугаар сараас 2019 оны арванхоёрдугаар сар хүртэлх зургаан сарын хугацаанд Хөгжлийн банкны гүйцэтгэх захирлаар ажиллаж байсны хувьд тус сонсголд гэрчээр оролцож, өөрийн зүгээс холбогдох тайлбарыг өглөө.

Одоо эрчээ аваад байгаа Хөгжлийн банкны чанаргүй зээлийн асуудлыг миний бие гүйцэтгэх захирлын албан үүргээ хүлээж авч байхдаа ч хэлж анхааруулж байсан. Мөн Монгол Улсын шүүх, прокурорын байгууллагуудтай хамтарч тухайн үедээ чанаргүй болоод байсан зээлүүдийг эргэн төлүүлэх ажлуудыг анх эхлүүлсэн.

Мөн Хөгжлийн банкны гүйцэтгэх захирлаар ажиллах хугацаандаа дангаараа дур мэдэж нэг ч шинэ зээл гаргаагүй. Хөгжлийн банкны зээлийн хороо, ТУЗ-ийн шийдвэр дээр үндэслэн зээл гарч байсан гэдгийг хариуцлагатайгаар мэдэгдэж байна.

Миний хувьд Хөгжлийн банкны гүйцэтгэх захирлаар томилогдсоны дараа зээлийн багцын чанарт мэргэжлийн банкирын хувьд өөрөө дүн шинжилгээ хийж, дүгнэлтээ Засгийн газарт тодорхой хэмжээнд тайлагнаж байсан. Тухайн үед 1.1 их наядын төгрөгийн зээлийн багц чанаргүй болж, зээлийн хүүгийн орлого тасалдахаар байсан тул удирдлагын баг ярилцсаны үндсэн дээр Монголбанкнаас дэмжлэг хүссэн. Хариуд нь бид гарч буй зээлд хяналт тавина, тайлангаа хүргүүлнэ, чанаргүй зээлд хэрхэн ажиллах талаар амлалт өгч байсан юм. Өмнөх сонсголын явцад Хөгжлийн банкны газрын дүгнэлтүүд дээр эрсдэлтэй байхад зээл олгосон гэх асуудлууд яригдсан. Эрсдэлгүй зээл гэж байдаггүй. Арилжааны, төрийн банк ч үйл ажиллагаандаа эрсдэлийг тодорхойлж дүгнэдэг” хэмээлээ.