Ж.Мөнхбат явлаа. Араас нь Т.Аюурсайхан өргөдлөө өгч, гишүүний бүрэн эрхээсээ татгалзлаа. Дараагийнх нь хэн бэ. Н.Наранбаатар, Д.Бат-Эрдэнэ үү гэх асуулт хөвөрч байна. Ийн ар араасаа дуу дуугаа авалцан өргөдлөө өгч байсан түүх үгүй.

Мөн УИХ-ын гишүүн Н.Алтанхуяг, Х.Ганхуяг, Г.Амартүвшин, Ё.Баатарбилэг нарт холбогдох Хөгжлийн банкны гэх мөнгө угаасан, авлига авсан, албан тушаал, эрх мэдлээ ашигласан гэх 80 орчим хүнд холбогдох хэргийг өнөөдөр шүүхэд шилжүүлж байна. Нүүрсний хэрэгт УИХ-ын 19 гишүүн, хоёр сайд холбоотой хэмээн Д.Пүрэвдорж гишүүн хэлсэн. Тэгвэл Г.Занданшатарын парламентын гуравны нэг нь ийнхүү Хөгжлийн банк, Нүүрсний хэрэгт холбоотой болж таарч байна.

МАН-ын Бүлгийн дарга Д.Тогтохсүрэн “Манай намд нүүрсний хулгайч нэг ч байхгүй” хэмээн том дуугарсан  ч удалгүй гишүүд нь АТГ-т дуудагдан амаа таглуулсан.

Хамгийн гол улс төрийн нүүдэл одоо л эхэлнэ. Засгийн газрыг огцруулах хуйвалдаан хэдийнэ эхэлсэн. Парламентаас Засгийг огцруулахаар болсон гэдгийг улстөрчид хэлж байна. Тодруулбал, гэмт хэрэгт холбогдсон гишүүд шүүхийн өмнө очиж, нэр төрөө сэвтүүлэн толгой гудайн зогсохын оронд улс төрийн нүүдэл хийн, Засгийг унагах тактик хувь илүү дээр гэдгийг хүлээн зөвшөөрч, Л.Оюун-Эрдэнийг танхимаар нь хөмрөхөөр зэхэж байгаа гэх. Үүний урьтал болгон Цагаан сарын дараа иргэдийн жагсаал идэвхжиж, ноогдол ашгаа авъя хэмээх турхиралт ширүүсч, эцэстээ өгч чадахгүй бол Засгийн газар огцор гэсэн дарааллаар улс төр өрнөнө гэдгийг ойрын эх сурвалж хэлж байна.