“Ноос, ноолуурын салбарын ажилчдын цалин хөлс, хөдөлмөрлөх эрхийн нөхцөл байдлын судалгаа”-ны үр дүнг танилцуулах уулзалт, хэлэлцүүлэг өнөөдөр боллоо. 
Хүнс, хөдөө аж ахуй, хөнгөн үйлдвэрийн дэд сайд М.Ганхүлэг: "Хөдөө аж ахуйн салбарт ажиллаж байгаа ажилчдын цалин хөлс бусад салбартай харьцуулахад бага байна. Тус салбарын хамгийн гол түүхий эд нь ноос, ноолуур юм. Засгийн газрын хуралдаанаар хүүгийн татаасын дэмжлэг олгох төсөл батлагдлаа. Хөнгөлөлттэй зээл авч, үйлдвэрлэлээ өргөжүүлж, шат дамжлагаа ахиулах боломж бүрдэж байгаа юм. Энэхүү үр дүн гарахаар өнөөдрийн бидний ярьж буй ажилчдын цалин нэмэгдэнэ.

Ноос, ноолуурын бүтээгдэхүүний  түүхий эдийг самнах, угаах дамжлага бий. Тухайн дамжлагыг үе шаттайгаар нэмэгдүүлж байна.  2022 онд угаасан ноолуурыг экспортод гаргах бодлогыг хэрэгжүүлсэн. Харин энэ онд самнах шат дамжлагыг хэрэгжүүлье гэж байгаа. Ингэснээр ажлын байр нэмэгдэж, нэмүү өртөг шингэсэн бүтээгдэхүүн бий болж байгаа учраас валютын урсгал дотоодод үлдэх боломжтой гэсэн тооцоолол хийсэн. Үйлдвэрлэлүүд ч өөрсдийн тоног төхөөрөмжөө сайжруулаад байна. Гэвч тухайн санал 2024 оны зургаадугаар сарыг хүртэл түр хойшлоод байна. Энэ байдал руу үе шаттайгаар шилжих нь зүйтэй гэж үзсэн.

Ноос, ноолуурын салбарын ажилчдын цалин хөлсийг цаашид хэрхэн нэмэгдүүлэх талаарх саналаа талууд өнөөдөр хэлэлцэж, гаргана.
Боловсон хүчин бүх салбарт дутагдалтай байна. Ноос, ноолуурын салбарт ажиллах сонирхолтой залуучуудын тоо багасаж байгаа. Мал эмнэлгийн салбарын хувьд ажиллаж байгаа хүмүүсийн нас 60-65 байна. Хөдөлмөрийн аюулгүй байдлын хувьд амь насаа алдах хэмжээний биш юм гэхэд янз бүрийн гэмтэл авах тохиолдол их байдаг. Эдгээр асуудал дээр анхаарч, төрөөс бодлогоор дэмжих, нөхөн олговор олгох ажлыг хийх шаардлагатай гэсэн дүгнэлт судалгаагаар гарсан" гэдгийг хэлсэн юм. 

Түүнчлэн "Маш олон жил түүхий эдийг нэмүү өртөг шингээж, экспортод гаргах талаар ярьж байгаа. Нэмүү өртөг шингээж экспортлох санаачилгыг ноолуурын салбараас эхлүүлэх боломжтой гэж харж байна. Зоригтой алхам хийж, дараагийн шат дамжлага руу оруулах шаардлагатай. Ингэснээр ажилчдын нийгмийн асуудал шийдэгдэнэ. Үйлдвэрлэгчдийн хувьд бэлэн байгаа" гэв.