Турк, Сирид хүчтэй газар хөдлөлт болсноос хойш долоо хоног өнгөрөөд байгаа ч аврагчид нуранги дороос амьд үлдсэн хүмүүсийг эрэн хайх ажиллагааг багасгаж эхэлжээ.
Даваа гарагийн оройн мэдээгээр хоёр улсад нийт 37,000 гаруй хүн амь үрэгдсэн гэж байгаа ч энэ тоо нь эцэслэсэн мэдээлэл биш юм. Туркийн Гамшгийн удирдлагын газрын мэдээлснээр тус улсад 31,643 хүн амь үрэгдсэн бол Сирийн баруун хойд хэсэгт, НҮБ-ын мэдээгээр амиа алдсан хүний ​​тоо 5714-д хүрсэн байна.

НҮБ 800 мянга гаруй хүн хоол тэжээлийн дутагдалд орсон гэж мэдээлсэн бөгөөд газар хөдлөлтийн улмаас амиа алдагсдын эцсийн тоо хоёр дахин нэмэгдэх төлөвтэй байгааг тус газар дахь тусламжийн агентлаг анхааруулж байгаа юм. 

Мөн хоёр улсын хүнсний нөөц дуусаж байгаа юм байна. Одоогоор Туркийн өмнөд хэсгийн Адана хотод ажиллаж байгаа нэгэн тусламжийн ажилтан шаардлагатай эд зүйлсийн маш урт жагсаалттай байгаа бөгөөд нэмээд дотуур хувцас, майхан, хөнжил хангалтгүй байгааг хэлжээ.

Мөн энэ долоо хоногт Турк, Сирид цаг агаарын нөхцөл байдал хүйтрэх төлөвтэй байгаа нь газар хөдлөлтийн улмаас орон гэргүй болсон хүмүүс болон аврагчдад нэмэлт хүндрэл учруулж байна.

Бямба гарагт амь үрэгдэгсдийн тоо 28,000-д хүрэх үед НҮБ-ын Хүмүүнлэгийн асуудал эрхэлсэн Ерөнхий нарийн бичгийн даргын орлогч, яаралтай тусламжийн зохицуулагч Мартин Гриффитс энэ тоо хоёр дахин буюу түүнээс ч их болох магадлалтай гэж мэдэгдэж байсан юм.