Канадын Гадаад хэргийн яам иргэддээ хандан Беларусь улс руу зорчихтой холбоотой сэрэмжлүүлэг гаргасан талаар ABC News агентлаг мэдээлсэн байна. 
Канадын Гадаад хэргийн яам иргэдээ Беларусь руу зорчихгүй байх, энэ улсад байгаа бол нэн даруй орхин гарахыг зөвлөжээ. Үүнийг Орос, Украины дайнтай холбоотой хэмээн Гадаад хэргийн яам тайлбарласны зэрэгцээ Беларусьт Канадын төрийн байгууллага байхгүй, Польш дахь Канадын элчин сайдын яам Беларусьт байгаа иргэддээ консулын үйлчилгээ үзүүлэх боломж хомс гэдгийг анхааруулсан байна. 

"Орон нутгийн хуулийг мушгин гуйвуулж ашиглах, Орос, Украины сөргөлдөөн даамжрах эрсдэл өндөр байгаа тул Беларусь руу аливаа байдлаар зорчихоос зайлсхийгээрэй. Та бүхэн Беларусьт байгаа бол өөрсдөө зардлаа гарган энэ улсаас явсан нь зүйтэй" хэмээн Канадын Гадаад хэргийн яамнаас мэдэгджээ.

Үүнээс өмнө, Францын Гадаад хэргийн яам мөн иргэдээ Беларусийг нэн даруй орхин гарахыг уриалсан юм. Түүнчлэн Орос дахь АНУ-ын Элчин сайдын яам "хууль бус баривчилгаа, шинээр дайчилгаа зарлагдаж болзошгүй тул" нэн даруй Оросоос явахыг иргэддээ хандан уриалж байв.