“REUTERS” агентлаг Турк, Сирийн газар хөдлөлтийн хохирлын хамгийн сүүлийн үеийн мэдээллийг тоймлон гаргажээ. Энэ мэдээгээр нас барсан иргэдийн тоо  37.357-д хүрсэн бол, гэмтэж бэртсэн хүний тоо 90 мянга дөхөж, үүнээс 31.643 хүн нь Турк улсад, 5700 нь Сирид нас баржээ. Мөн 6.589 барилга, орон сууц нурснаар 1.3 сая хүнийг нүүлгэн шилжүүлсэн байна. Эд хөрөнгийн хохирлыг ойролцоогоор 50-85 тэрбум ам.доллар гэж тооцоолоод байгаа юм байна. 

Газар хөдлөлт болсон бүс нутагт амьдардаг хүмүүс дахин газар хөдлөх, эсвэл байшингийн гэмтсэн хэсгүүд дээрээс нурахаас айж гэр, байшин руугаа орж чадахгүй гадаа хонож байгаа юм байна.

“Цагаан дуулгатнууд” хэмээх сайн дурын байгууллага Сирийн хойд болон баруун хойд хэсгийн бүс нутагт хоёрдугаар сарын 20-ныг хүртэл гашуудал зарлажээ. НҮБ-ын тусламжийг хүргэхийг зөвшөөрсөн Туркийн цор ганц гарц Баб аль-Хава гарам нь хэдэн өдрийн турш нэвтрэх боломжгүй байсан. Тэгвэл өчигдөр /2023.02.13/ НҮБ-ын Ерөнхий нарийн бичгийн дарга Антонио Гутерришийн хийсэн мэдэгдэлд дурдсанаар Сири рүү хоёр гарц шинээр нээхийг зөвшөөрчээ. Тодруулбал, Баб аль-Салам болон Аль Раеэ гэсэн хоёр боомтыг гурван сарын хугацаанд нээхээр болсон байна.

“CNN” агентлагийн мэдээлснээр Турк улсад газар хөдлөлтийн улмаас 1.362 хүүхэд эцэг эхээсээ салсан байна. Эндээс 369-ийг нь ар гэрийнхэнтэй нь уулзуулсан бол 792 хүүхэд эмнэлэгт, 201 хүүхэд Гэр бүл, нийгмийн үйлчилгээний яамны харъяа байгууллагуудад хэвтэн эмчлүүлж байна. Харин 291 хүүхдийг хэн болохыг нь тодорхойлж чадаагүй байгаа гэжээ. 

Туркийн Эрүүл мэндийн яамнаас мэдээлснээр эмнэлгүүдэд нийт 19.300 хүн эмчлүүлж, эдгээрээс 3.636 нь эрчимт эмчилгээний тасагт байгааг өчигдөр мэдээллээ.