Хууль хяналтынхан сав л хийвэл хорино, цагдана гэх. Үнэхээр хорьж, цагдан байж хэргийг нь шийдэх зайлшгүй тохиолдол байдаг л байх. Гэхдээ л дийлэнхдээ улс даяар зарлан, гэмт хэрэгтэн хэмээн цоллон баривчлан саатуулснаа удалгүй сулладаг. Аажмаар хэрэг нь хэрэг биш болон замхардаг жишээ манайд олон. Тухайн хүний нэр төр, ажил төрөл, ар гэрийнхний сэтгэл санаа юу ч биш байх нь бий. Х.Тэмүүжин Хууль зүйн сайдаар ажиллаж байхдаа энэ бүхний эсрэг хуулийн төслийг өргөн барьж, зарим нэгийг нь батлуулж чадсан ч хэрэгжүүлж чадаагүй юм. Энэ талаараа тэрбээр “Хэцүү ч юм даа. Хүнийг заавал барьж, хорьж мөрддөг. Хэрэгт шалгахдаа хэмжээ хязгааргүй хувийн амьдралаар нь оролддог. Хуулийн хариуцлага тооцохоос өмнө нэр төрийг нь харлуулж, гутаадаг. Нотлох баримтаар гэхээсээ хар сэжиг, хов жив, цахим сэтгэгдлээр яллах гэж зүтгэдэг. Хуулиар биш даргын үгээр буруутгаж, шийтгэх гэж дайрдаг. Эрүүл, саруулаар сэтгэж, хууль дүрэм ярьсан бүхнээ дайсан урвагч мэт үзэж дардаг энэ муухай хууль хүчний гэх байгууллага, тэдний хуучирсан болхи арга барилыг өөрчлөх гэж олон хууль, шийдвэрийг УИХ-д өргөн барьж, хагас хугасыг нь арай гэж батлуулж байлаа. Гэтэл засаг солигдонгуут шинэ сайд Д.Дорлигжав Ерөнхий сайд Ч.Сайханбилэгийн гарын үсэгтэй бичгээр бүгдийг нь буцаан татуулчихаж билээ. Баталсан цөөн хэдийг нь МАН эрх барингуутаа хүчингүй болгочихсон!!!

Одоо тэд минь харилцан "хонгилдсоор" сууна. Нэг их удахгүй МАН-ын хэд бас хонгилдоо сорогдоно. Махчид хажуу хавиргаасаа махчилж, махны машин эзнээ эргээд машинддаг нь зүй тогтол юм даа. Юу тарина түүнийхээ үрийг л хураана” хэмээн харуусчээ.