Сүхбаатар дүүргийн Эрүүгийн хэргийн анхан шатны шүүхээс “Хөгжлийн банк”-ны гэх эрүүгийн хэргийн урьдчилсан хэлэлцүүлэг өнөөдөр хоёрдахь өдрөө хаалттай үргэлжилж байна. Уг хуралдааныг “Шүүх хуралдааныг шүүхийн байрнаас бусад газарт хийх нийтлэг журам”-ын дагуу хэргийн оролцогчид багтахуйц танхим болох Улаанбаатар чуулгын байранд зохион байгуулж байгаа юм.   

Шүүхийн урьдчилсан хэлэлцүүлэгт яллагдагч 80 хүн, дөрвөн хуулийн этгээд, прокурор зургаа, өмгөөлөгч 106, гэрч 28, хохирогчийн төлөөлөгч хоёр, шинжээч 10, хууль ёсны төлөөлөгчид 15, нийт 257 хэргийн оролцогч оролцох ёстой юм.  Мөн урьд хожид байгаагүй 100 гаруй өмгөөлөгч оролцож буйгаараа онцлог.

Шүүх хуралд оролцогчид хуралдааныг хойшлуулах, хуралдаанг даргалагчаас татгалзах хүсэлтийг гаргад амжилт олоогүй. Харин хуралдааныг хаалттай явуулах хүсэлтийг шүүх хүлээн авч, эрхийг нь хангасан юм. Тодруулбал, өмгөөлөгчид "Хувь хүний нууцад хамаарах мэдээлэл ярих учраас шүүх хурлыг хаалттай явуулж өгнө үү" хэмээн хүсэлт гаргасан юм. 

Хөгжлийн банкны шүүх хуралд оролцох ёстой 80 хүний дотор Н.Алтанхуяг, Г.Амартүвшин, Ё.Баатарбилэг, Х.Ганхуяг нарын  УИХ-ын гишүүд бий. Харин УИХ-ын гишүүн Н.Алтанхуяг ганцаар шүүх хуралд биечлэн оролцож, бусад нь өмгөөлөгчөө биет төлөөлөгчөөр илгээсэн байлаа. Харин Н.Алтанхуяг гишүүний хувьд шүүх хуралдааныг олон нийтэд ил тод, нээлттэй явуулах хүсэлт гаргаж, “Миний бие "Хегжлийн банк"-тай холбоотой гэмт хэрэг үйлдээгүй тул урьдчилсан хэлэлцүүлгийн надтай холбоотой хэсгийг олон нийтэд ил тод, нээлттай явуулж өгнө үү" хэмээсэн юм. Шүүх хуралдааныг анхнаас нь хаалттай явуулж эхэлсэн тул нэгээхэн хэсгийг нээлттэй явуулах нь эргэлзээтэй. Гэвч шүүх Н.Алтанхуяг гишүүний хүсэлтэд одоогоор хариулт өгөөгүй байна.