Засгийн газар анхлан “шүгэл” үлээж, нүүрсний хулгайтай эрчимтэй тэмцэх болсон талаар Ерөнхий сайд Л.Оюун-Эрдэнэ чуулганы индэр дээрээс мэдэгдсэн. Тэрбээр үүний тулд ардын нам, анд нөхөдтэйгөө тангараг тасрах дээрээ тулах байх. Гэвч хулчийж хойш суухгүй хэмээж байв. Энэ нь ч үр дүнгээ өгч, нүүрсний хулгайн хэрэгт гар дүрээгүй төрийн өндөр болон дунд шатны албан тушаалтан үгүй гэдгийг шалгаж тогтоосон. Харин Засгийн газрын үлээсэн шүгэл өдгөө төрийн түшээд хэн бүхэнд хамааралтай болчихжээ. 

УИХ-ын гишүүн Ш.Адьшаа гэхэд сонгогдсон тойргууддаа ажиллаж, УИХ-аас баталсан хууль тогтоомж болоод хийж, хэрэгжүүлсэн ажлаа тайлагнаж буй. Харамсалтай нь, зарим гишүүн Засгийн газар, УИХ-ын хийсэн ажлыг өөртөө нялзааж, сонгогчдоосоо оноо авах гэж худал үнэн ярьсан нь баригдаж, онигоо болж байна. Үүний нэг нь Ш.Адьшаа гишүүн юм. Тэрбээр “ 2022 оны дөрөвдүгээр  сарын 6-ны өдөр УИХ-ын 26 гишүүнээр гарын үсгээ зуруулж, Нүүрсний хулгай, тээвэр ложистикийг шалгах  УИХ-ын түр хороог байгуулсан. Энэ  түр хороог байгуулж, нүүрсний хулгайн талаар анхны шүглийг үлээсэн хүн нь би. Гишүүний хувьд анх олон нийтийн, төрийн, хэвлэл мэдээллийн анхааралд оруулсандаа би өнөөдөр хэлэх үгтэй та бүхний өмнө зогсож байна” гэв. Бөглүү хөдөөд юу ч гэж ярьсан яадаг юм гэж боддог бололтой.