2020 онд АНУ-ын мэргэжлийн сагсан бөмбөгийн шилдэг тамирчин Кобе Брайант 13 настай охины хамт нисдэг тэрэгний ослоор амь насаа алдсан. Тухайн үед ослын газарт ажилласан аврагчид хохирогчдын цогцсын гэрэл зургийг хамааралгүй хүмүүсийн дунд тараасан нь мэргэжлийн ёс зүйн хувьд ноцтой алдаа болж байсан.

Талийгаачийн гэр бүлийн зүгээс сэтгэл санааны хохирлоо барагдуулахаар ийм алдаа гаргасан Лос-Анжелесын засаг захиргааг шүүхэд өгсөн. Улмаар өчигдөр тэд энэ асуудлаар тохиролцоонд хүрч, орон нутгийн захиргаа Кобе Брайантын гэр бүлд нийтдээ $28.5 саяыг төлөхөөр болжээ.

Тохиролцооны дагуу талийгаачийн бэлэвсэн эхнэр Ванесса Брайант болон гурван охин нь дахин энэ асуудлаар маргаан үүсгэхгүй, хэргийг бүрмөсөн хаахаар болсон байна.

 

“Бүдүүлэг үйлдэл гаргасан хүмүүст хариуцлага тооцох хатагтай Брайантын тэмцэл өнөөдөр амжилттай өндөрлөж байна. Тэрбээр талийгаач нөхөр, охиныхоо төлөө, үүнтэй ижил төстэй шалтгаанаар зовж шаналсан бусад хүмүүсийн төлөө тэмцсэн юм”  гэж тэдний гэр бүлийн өмгөөлөгч Луис Ли мэдэгджээ.

Лос-Анжелесын талыг өмгөөлсөн Мира Хашмол маргаан шударга шийдэгдсэнийг мэдэгдээд “Хатагтай Брайант болон түүний охидын сэтгэл санааны шарх цаашдаа бүрэн эдгэрнэ гэдэгт найдаж байна” гэж хэлсэн байна.

Тухайн үед аврагчид ажил үүргийн шаардлагаар цогцсуудын болон нисдэг тэрэгний үлдэгдлийн зургийг авсан гэж өмгөөлөгч Хашмолл шүүхэд тайлбарлаж байжээ.

Харин гомдол гаргагч тал үүнийг зөвхөн сониуч зангаар бусдын анхаарлыг татаж, дуулиан дэгдээх зорилготой үйлдэл гэж үзсэн байна.