Зогсохгүй продакшн, Treasury studio нь хамтарсан өргөн дэлгэцийн анхны уран бүтээлээ танилцуулахад бэлэн боллоо. Tус хоёр продакшн болон Cine vibe film-ийн хамтарсан уран бүтээл болох “ЗУРВАС” уран сайхны кино гуравдугаар сарын 11-нд нээлтээ хийх гэж байна.

Кино бүтээлээр Монгол орны хойд хязгаарт эх орныхоо хилийг амь бие, сэтгэл итгэлээрээ хамгаалж яваа өнөө цагийн хилчдийн бодит үнэн дүр төрхийг харуулахыг зорьжээ.  

Эцэг өвгөдөөс минь өвлөгдөн ирсэн эх орныхоо дархан хилийг хамгаалж буй үе үеийн цэргийн албан хаагчид, төдийгүй бүх насныханд зориулан бүтээсэнд  “Зурвас” уран сайхны киноны ач холбогдол оршиж байна.

Энэхүү бүтээлд СУИС, КУДС-аас ажлын гараагаа эхэлсэн нэгэн үеийн залуу уран бүтээлчид оролцжээ. Киноны ерөнхий найруулагчаар Я. Төгс-Амгалан ажиллаж, продюссероор Зогсохгүй продакшны жүжигчин А.Дүүрэнжаргал, Treasury studio-ийн жүжигчин Б.Эрдэмсайхан, ерөнхий зураглаачаар Д.Хишигбаатар нар ажиллажээ.

Зурвас киноны гол дүрд Г.Эрдэнэболд, Я.Төгсжаргалан, Э.Лувсанцэрэн, Ү.Түмэнжаргал нар тоглосон байна. Харин туслах дүрүүдэд Т.Бат-Эрдэнэ,Ч.Номин-Ангараг, Т.Болортуяа , Э.Эрдэнэбаяр, Г.Тайванбаатар, Ж.Саруул-Эрдэнэ зэрэг залуу уран бүтээлчид оролцон тогложээ.